Il rom moviment e sport presta ina contribuziun centrala a favur da l'incumbensa da furmaziun da la scola populara: el cumplettescha quella cun la dimensiun corporala e motorica. En l'instrucziun da moviment e sport daventan las scolaras ed ils scolars abels da far part da la cultura tradiziunala ed actuala da moviment e sport. Els megliereschan il sentiment per lur corp, vegnan dad ir enturn sapientivamain cun sasezs e cun auters e vesan ils avantatgs ch'il moviment corporal ha per la sanadad ed il bainesser. Il moviment communabel sustegna la participaziun activa a la cuminanza da scola e promova la convivenza.
Las scolaras ed ils scolars extendan lur cumpetenza individuala da moviment e sport. Els emprendan successiuns da moviments, furmas da gieu, disciplinas da sport e furmas da concurrenza. Els acquistan cumpetenzas per sa participar a moda activa ed independenta e cun responsabladad a la cultura da moviment e sport actuala era suenter il temp da scola, ma era cumpetenzas per reflectar questa cultura a moda critica areguard sias pussaivladads, schanzas e ristgas.
Las scolaras ed ils scolars megliereschan lur abilitads motoricas e lur capacitad da prestaziun corporala e sviluppan aspects emoziunals, socials, cognitivs, motivaziunals e voliziunals da lur persunalitad. Els emprendan d'enconuscher sasezs en differentas situaziuns da moviment e fan numerus moviments da basa che vegnan sviluppads vinavant ad abilitads ed inschigns sportivs. Questas experientschas da moviment furman la basa per percepir e chapir l'agen corp e procuran che las scolaras ed ils scolars van enturn sapientivamain cun il corp. Muments da success e plaschair vi dal moviment e sport èn facturs decisivs per in interess duraivel per activitads sportivas.
Il rom moviment e sport gida a reflectar e giuditgar realisticamain l'atgna capacitad da prestaziun. Las scolaras ed ils scolars daventan conscients da las pussaivladads da svilup da lur corp ed augmentan la confidenza en sasezs tras muments da success en il sport.
Tras acziuns da moviment resultan relaziuns tranter ils uffants e giuvenils. En l'in cun l'auter ed in cunter l'auter na rimnan els betg mo experientschas motoricas, mabain era emoziunalas e socialas. Tras l'elavuraziun e la reflexiun da questas experientschas presta l'instrucziun da moviment e sport ina contribuziun impurtanta a favur da la promoziun da las cumpetenzas transversalas.
Il moviment ed il sport sustegnan las scolas cun dar ad ellas in profil da scola che sustegna il moviment e che promova la sanadad. En il mintgadi da scola stoi vegnir tegnì quint dal basegn natiral da sa mover dals uffants e giuvenils. Tras in moviment regular promova la scola il svilup e l'emprender da las scolaras e dals scolars.
Tras impuls pon las persunas d'instrucziun contribuir lur part a favur d'ina concepziun activa da las pausas sco era sustegnair ils interess d'ina scola en moviment. Ina scola che promova il moviment sa distingua tras purschidas da sport da scola voluntar che vegnan integradas era en structuras dal di e che pon servir sco liom al sport d'uniuns.
Ordaifer l'instrucziun vegnan realisadas occurrenzas da sport e champs da sport. Las scolaras ed ils scolars san extender ed applitgar abilitads acquistadas u reussir en ina concurrenza sportiva. A medem temp pussibiliteschan talas occurrenzas eveniments da cuminanza che promovan l'identificaziun cun la cuminanza da scola.
